【寬頻搬遷】你未必知嘅陷阱 !!!!! 日期: 2020-08-12 20:08

 你好呀! 麻煩你將我條寬頻搬去......!
 請稍等， 幫緊你.... ，幫緊你... ，唔好意思， 新地址我地暫時無覆蓋! 


你應該會覺得哩個無耐嘅情況一定係理所當然等於「無條件釋放」? 如果你咁諗就錯啦 !

首先電訊公司向你提供寬頻服務時往往都會寫明合約期內只限該地址使用， 所以理論上你係要喺該地址完成合約期， 因此上述情況都可能被視為毁約。 唔係呀嘛? 係呀 ! 佢話寫明左喺條款嗰幾千細字入面， 你無睇啫!


咁會點呀?

  最好當然係「無條件釋放」  ?       


比較仁慈嘅電訊公司只要求提供相關地址證明或者已安裝其他電訊公司嘅證明 ，就會酌情處理， 免你餘下月費俾你「分手」，或者俾你暫時「假釋」， 即係日後如果你搬去一個佢地有覆蓋嘅地方， 就要履行返餘下合約期。 


  「有條件釋放」  ?                          


先係皇恩浩蕩免你餘下月費， 但如你曾經收取對方定情信物(即禮品)， 咁你或者要準備定計數機， 因為有啲公司會要求你賠返該個定情信物嘅價值， 而且多數係以簽約時嘅建議零售價去計! 因為你真係未完成合約! 唔係呀嘛? 係呀 ! 佢話寫明左喺條款嗰幾千細字入面......


  「安裝費? 唔係豁免左咩?」  ?      



除左定情信物嘅問題之外， 你可能要面對另一種更無耐嘅「有條件釋放」， 就係有啲公司會同你收返安裝費， 因為佢之所以豁免你安裝費係因為預你要履行合約期， 如今被迫分手， 咁就會同你計數! 你可能會諗， 咁最多都可能係最經典嘅$680 ， 豪俾佢! 先生唔好意思， 係$1800， 因為個地址標準安裝費係$1800。唔係呀嘛? 係呀 ! 佢話寫明左喺條款嗰幾千細字入面......




所以「鴨仔」建議大家， 如果預左短期內會搬遷， 最好問實Sales如果遇到上述情況會點處理! 當然亦要俾心機刨下啲魔鬼細則！因為現時都無任何一間公司夠胆話自己有100%覆蓋! 萬一不幸地遇到上述個案， 如果傾唔掂， 可以試下向一啲監管機構例如消費者委員會或OFCA 通訊事務管理局辦公室(OFCA)求助， 或者搵「解決顧客投訴計劃」。



推薦閱讀


  <<光纖搬遷一肚氣?>>

  唔想含冤受屈，試下搵電訊「和事佬」


伸延閱讀
分享


使用者資訊

QuoQuoAPP Ltd 版權 © 2024